-
İranda keçmiş xüsusi xidmət əməkdaşını öldürməkdə təqsirləndirilən Reyhaneh Jabbari oktyabrın 25-də asılaraq edam olunub.
Reyhaneh Jabbari isə bildirirdi ki, Morteza Abdolali Sarbandi-ni özünümüdafiə məqsədi ilə bıçaqlayıb. O, Sarbandi-nin onu zorlamaq istədiyini iddia edirdi.
Məhkəmə zorlama ittihamını rədd edib. Məhkəmənin gəldiyi qənaətə görə, 27 yaşlı Reyhaneh Jabbari Sarbandi-ni vurmaq üçün bıçağı əvvəlcədən alıbmış:
«Bıçaq zərbəsi mərhumun belinə endirilib ki, bu da qətlin özünümüdafiə məqsədi güdmədiyini göstərir».
İstintaq materiallarına əsasən, Reyhaneh qətldən üç gün əvvəl Sarbandi-ni öldürəcəyi haqda dostuna telefonla mesaj da yazıb.
Qətl hadisəsi 2007-ci ildə baş verib. Jabbari barəsində edam qərarı 2009-cu ildə çıxarılsa da, hökm İran Ali Məhkəməsi qərarı qüvvədə saxladıqdan sonra icra olunub. Öldürülən şəxsin ailəsi «qan pulu» müqabilində Jabbari-nin həyatını xilas edə bilərdi. Lakin onlar bundan imtina ediblər.
«Amnesty International» edamdan əvvəl yaydığı bəyanatda istintaqın yanlış aparıldığını, Jabbari-nin iddialarının lazımınca araşdırılmadığını bildirib.
Ölüm hökmünə qarşı çıxan «Amnesty International» uzun illərdir buna görə İranı tənqid edir.
